لقاء مع السيد المسؤول

في الأول نحب ننوّه للسادة اللي بيسمعونا واللي بيقرولنا إن ده هيبقى برنامج كل أسبوع.. وفي كل اسبوع هنستضيف مسؤول مهم جدا في الدولة.. مسؤول مهم خالص مسئول ليه تُقله في البلد وهنتحاور معاه في كل حاجة وفي اي حاجة وكمان ممكن نستقبل منكم اتصالاتكم ونستقبل ارائكم على البريد الالكتروني بتاعنا ونوعدكم اننا نسألها للسيد المسؤول
النهاردة معانا مسئول في منصب كبير.. من موقعه ممكن يغير حاجات كتير وهنسأله الأسئلة التالية

******

المذيعة: اول سؤال معانا النهاردة هو بصراحة سؤال بيشغل بال الكثير من المواطنين.. الناس كلها بتسأل.. عم امين بيسأل.. عم احمد الخضري كل ما يشوفني يسألني: هو مين اللي هيمسك الحكم بعد اللي ربنا يطولنا في عمرة ما يتّكل؟
المسؤول: والله انا احب اطمّن عم امين وعم احمد الخضري واطمّن الشعب كله واقولهم ان فيه خطة مدروسة ومعمول حسابها.. خطة اسمها اللي نعرفه احسن من اللي مانعرفوش
المذيعة: معلش يا فندم اسمها ايه تاني الخطة؟
المسؤول: اسمها اللي نعرفه احسن من اللي مانعرفوش.. يعني انتي هتلاقي فين حد ينفع للحكم غير واحد آكل شارب نايم مع رئيس البلد.. بيشوفه بيعمل ايه.. بيتكلم ازاي.. بياكل ازاي.. لا مؤخذة بيدخل الحمام ازاي.. وده طبعا متمثل في ابن الرئيس الحالى شخصيا.. وبعدين الناس معترضة ليه على ان ابن الرئيس يبقى هو الرئيس؟ ما انتي عندك كل ممثل بيحس انه خلاص بيشطّب يروح مطلّع ابنه ويمثل والناس تقعد تسقف واي لعيب كورة ربنا بيكرمه وبيعتزل بتلاقيه وهو ماسك شنطة الفلوس بتاعة الاعتزال في ايد وفانلة في ايد تانية بيلبّسها لابنه وده اللي بنسميه توارث الاجيال
المذيعة: يارب نكون قدرنا نرد على تساؤلات كل الناس وبالذات عم احمد الخضري اللي خاوتني في الرايحة والجاية
فاصل مع الاعلان ونرجعلكم تاني
*******

::: فاصل :::

*******
المذيعة: بعد الفاصل رجعنالكم ويارب الاعلانات تكون عجبتكم.. والله الشامبو اللي في الاعلان ده رائع انا بستعمله.. ولاّ مسحوق الغسيل ما قولكمش عليه.. المهم نرجع لضيفنا العزيز وبنحييه مرة تانية وبنسأله سؤال مهم اخر بيدور في تفكير كل مواطن: ايه اخر ما توصلت اليه التحقيقات في موضوع حريق قطار الصعيد؟
المسؤول: والله احنا شكلنا لجنة لتقصّي الحقائق من خيرة ظباط البلد وهم وصلوا لنتائج مبهرة واكتشفوا ان حريق قطار الصعيد جه غلط ومش مقصود.. واحنا بناء على التقرير ده قولنا خلاص مادام الموضوع مش مقصود يبقى المسامح كريم واحنا في ايام مفترجه وملوش لزوم ننكّد على حد
المذيعة: احنا ممكن نُطلع السادة المشاهدين على نتائج التحقيق ولا دي اسرار عليا؟
المسؤول: والله هيّ اسرار عليا جدا بس علشان خاطر عيونك الحلوين دول انا هقولهم.. هوّ الموضوع بكل بساطة ان في ست اسمها ام عماد
المذيعة بفضول: اسمها ايه يافندم؟
المسؤول: اسمها ام عماد واسمها ده دليل على المجهود اللي بذلوه الظباط في التحقيق لدرجة انهم قدروا يعرفوا اسمها واسم ابنها كمان
المذيعة بفرحة: لا والله العظيم لازم يترقّوا على اللي عملوه ده
المسؤول: الناس دي بيشتغلوا في صمت من اجل مصر وشعب مصر.. المهم ام عماد دي بقى كانت رايحة تزور ابنها في الجيش وكانت واخده معاها فضلت خيرك حلتين محشي وفرختين وشوية خضار للواد علشان ياخدهم في الزيارة.. بس الوقت كبس عليها مقدرتش تخلّص كل الاكل فـ اخدت معاها باجور علشان تكمل سوى الاكل في القطر.. وهيّ قاعدة بتسوي الاكل ومع الزحمة النار مسكت في جلابية الواد حميدة اللي كان قاعد جمبها والواد الغبي ابن الغبي فضل يجري في القطر وهو مولع لحد ماولّع في القطر كله.. الغبي مش ولع خلاص بقي يقعد في مكانه لا.. فرحان انه ولع وعمال يجري في القطر لحد ماولع في القطر كله.. واحنا الحمد لله صادرنا الباجور والموضوع اتلمّ وكل حي بياخد نصيبه
المذيعة: والله يا فندم مجهود كبير جدا تشكروا عليه وربنا يخليكوا للبلد
فاصل مع الاعلان ثم نواصل
*******
::: فاصل :::

*******

المذيعة: بعد الاعلان رجعنلكم.. بجد وحشتونا ونتوجة بالشكر مرة اخريى للسيد المسؤول اللي شرفنا في برنامجنا النهاردة.. حضرتك شوفة الاعلان بتاع الزبادي.. شوفت البت اللي نازلة لهط في الزبادي دي البت نوسة اختي.. عفريتة بنت الايه
وبمناسبة الزبادي واللبن عايزين نسال حضرتك سؤال مهم جدا عن موضوع اللبن اللي فيه جبس ده؟
المسؤول: والله ده موضوع مهم جدا طبعا.. انا سمعت عن الموضوع ده وبطمّن كل المواطنين ان اللبن اللي فيه جبس واسمنت وخرسانة مسلحة ده هو اللبن السايب اللي عند البقالين وبعض الشركات اللي معندهاش ضمير.. وده طبعا انا باحذر السادة المواطنين من شربه
المذيعة: طب والبياعين والشركات اللي بتبيع اللبن المغشوش دول هتعملوا فيهم ايه؟
المسؤول: والله احنا خدنا اجراءتنا بالفعل
المذيعة بفضول غير عادي: ازاي؟
المسؤول: قفلنا كل محلات الجبس والاسمنت اللي قريبة من البائعين دول ومن شركات اللبن المغشوش
المذيعة: والله العظيم والله العظيم ده الحل المثالى ربنا يارب يقويكم على فعل الخير

الله يخرب بتهم
امين يا رب

» لقاء بلاحدود